Attached
විසිවන සියවස මැද භාගය වන විට වෛද්‍ය භූගෝල විද්‍යාත්මක පර්යේෂණ පිළිබඳ ව බොහෝ පර්යේෂකයින්ගේ අවධානය යොමු වී ඇත. වෛද්‍ය භූගෝල විද්‍යාවේ ආරම්භය හා විකාශනය දෙස බැලීමේ දී පසුගිය දශක දෙකක කාල පරිච්ඡේදය තුළ සැලකිය යුතු පර්යේෂණයන් ප්‍රමාණයක් සිදු කර ඇත. එසේ වුවත් ක්ෂුද්‍ර මට්ටමේ පර්යේෂණවල පවතින්නා වූ හිඩස පිරවීමේ අරමුණ ඇති ව "රත්නපුර නගරයේ පාරිසරික සෞඛ්‍යය තත්ත්වය පිළිබඳ කාලික සහ අවකාශීය විශ්ලේෂණයක්" යන මැයෙන් මෙම පර්යේෂණය සිදුකරන ලදී.
මෙහි දී විශේෂයෙන් රත්නපුර නගරයත්, එහි පවතින්නා වූ පාරිසරික තත්ත්වය රෝග බෝවීම කෙරෙහි බලපාන ආකාරයත්, එසේම රෝග පාලනයේ දී අනුගමනය කරනු ලබන ක්‍රමවේදයන් පිළිබඳ ව සහ ඒ සඳහා පවතින්නා වූ සේවාවන්ගේ ප්‍රමාණාත්මක භාවය පිළිබඳවත්, අවධානය යොමු කරන ලදී.
මෙවැනි අධ්‍යයනයක් සඳහා අවශ්‍ය වන්නා වූ දත්ත රැස් කිරීමේ දී ලිඛිත මූලාශ්‍ර සහ ආයතන සතු දත්ත මෙන් ම ප්‍රාථමික මූලාශ්‍රයන් වශයෙන් ව්‍යුහගත, අර්ධ ව්‍යුහගත හා අවිධිමත් සාකච්ඡා මෙන් ම නිරීක්ෂණ ද භාවිතා කරන ලදී. එම දත්ත විශ්ලේෂණයේ දී ප්‍රමාණාත්මක හා ගුණාත්මක ක්‍රමවේදයන් මෙන් ම සිතියම් විද්‍යාත්මක ක්‍රම ශිල්පයන් ද භාවිතයට ගැනිණ.
“රත්නපුර නගරයේ පාරිසරික සෞඛ්‍යය තත්ත්වය” පිළිබඳ ව කරන ලද මෙම අධ්‍යයනයෙන් රෝග බෝවීම හා ව්‍යාප්තිය කෙරෙහි මූලික වශයෙන් නාගරික ප්‍රජාව සහ ව්‍යාපාරික ප්‍රජාව විසින් පරිසරයට කරනු ලබන බලපෑමත්, ස්වභාවික ආපදා තත්ත්වයෙනුත් ඍජු දායකත්වයක් දරණු ලබන බව පෙනුණි. මීට අමතර ව නගර කළමනාකරණයෙහි පවතින දුර්වලතාවයන් ද පාරිසරික සෞඛ්‍ය ගැටලු ඇතිවීම කෙරෙහි ප්‍රබල බලපෑමක් සිදුකර ඇති බව හඳුනා ගැනිණ.
