Attached
ලෝකය තරම්ම පැරණි මෙතෙක් නොවිසඳුණු ප්‍රධාන සමාජ ආර්ථික ගැටලුවක් වශයෙන් දරිද්‍රතාවය හඳුනාගත හැකිය. මෙය නූතන සහභාගිත්ව සංවර්ධන ප්‍රවේශයේ සමාජ සජීවිකරණ මුලිකාංගය මත පදනම් වූ ක්‍රියාවලියකි. ශ්‍රී ලංකාවේ දරිද්‍රතාවය පිළිබඳ මෑතකාලීන ප්‍රවණතා අතර ප්‍රධාන ලක්ෂණය වන්නේ දරිද්‍රතා ප්‍රතිශතය අඛණ්ඩව පහත යාම වුවත්, වැඩිවන ජනගහනය හේතුවෙන් එහි ප්‍රමාණාත්මක අඩු වීම සිදුවන්නේ ඉතා මන්දගාමීව වේ. එබැවින් ශ්‍රී ලංකාවේ දරිද්‍රතාව පිටුදැකීමේ උපකරණ සහ මෙවලම් විධිමත් සහ විනිවිද භාවයකට ලක් කිරීම කාලීන අවශ්‍යතාවයකි. ඒ අනුව මෙම පර්යේක්ෂණය තුළින් අවධානය යොමු කරනු ලබන්නේ ග්‍රාමීය අංශයේ ක්ෂුද්‍ර මූල්‍ය සමඟ සම්බන්ධ වී සිටින දරිද්‍රතාවයෙන් පෙළෙන පිරිස ආර්ථිකමය සහ සමාජීය වශයෙන් බලගැන්වීම සඳහා විධිමත් අංශයේ රාජ්‍ය සහ වානිජකරණය වූ ක්ෂුද්‍ර මූල්‍ය නිෂ්පාදනයන් භාවිතා කරන ග්‍රාමීය ප්‍රජාව දරිද්‍රතාවයෙන් මිදීමට සහ ජීවන මට්ටම නගාසිටුවීම සඳහා ඔවුන්ගේ පුද්ගල මූල්‍ය සාක්‍ෂරතාව ප්‍රසස්ථ මූල්‍ය තීරණ ගැනීමේදී කොපමණ ප්‍රමාණයකින් තීරණාත්මක සාධකයක් වී තිබේද යන්න පිළිබඳව අධ්‍යයනය කිරීමයි. අධ්‍යයන අරමුණු සඳහා ප්‍රශ්නාවලි ක්‍රමය උපයෝගී කර බසනැරඑ පරිමාණයේ දත්ත ක්ෂේත්‍ර අධ්‍යයනය මගින් ලබා ගන්නා ලදී. පුද්ගල මූල්‍ය සාක්‍ෂරතාවය සහ ක්ෂුද්‍ර මූල්‍ය පහසුකම් භාවිතා කිරීමේ කාර්යයසාධනය සඳහා සංයුත්ත දර්ශකයන් ගොඩ නගන ලදී. හම්බන්තොට දිස්ත්‍රික්කය කටුවන ප්‍රාදේශීය ලේකම් කොට්ඨාසයේ අංක 500 දරණ මිද්දෙණිය නැගෙනහිර ග්‍රාම නිලධාරී වසම අධ්‍යන ප්‍රදේශය වේ. ඡන්දහිමි නාමලේඛනය උපයෝගී කර වසමේ මුළු කුටුම්බ 532 ක් අතරින් කුටුම්බ 100 ක නියදියක් සරළ සසම්භාවී නියදීම් ක්‍රමය භාවිතා කර තෝරා ගන්නා ලදී. මූලික සහ උසස් මූල්‍ය සාක්‍ෂරතාවය යටතේ ක්ෂුද්‍ර මූල්‍ය කාර්යයසාධනය ඇස්තමේන්තු කිරීම සඳහා සිදු කරන ලද බහුගුණ ප්‍රතිපායන විශ්ලේෂණයේ ප්‍රතිඵල පහත පරිදි විය. මූලික මූල්‍ය සාක්‍ෂරතාවය සහ කාර්යයසාධනය අතර සහසම්බන්ධතා සංගුණකයේ අගය 0.669 ක් වන බැවින් එම විචල්‍යයන් අතර ධන සහසම්බන්ධතාවක් පැවතීමත්, මූලික මූල්‍ය සාක්‍ෂරතාවය සහ උසස් මුල්‍ය සාක්‍ෂරතාවය, ක්ෂුද්‍ර මූල්‍ය කාර්යයසාධනය යන විචල්‍යය සමග සරල රේඛීය සම්බන්ධතාවයක් පැවතීමත් නිසා බහුගුණ ප්‍රතිපායන ආදර්ශ ආකෘතිය ගොඩ නැගීමට හැකි විය. මෙම අධ්‍යනය හරහා මූලික මූල්‍ය සාක්‍ෂරතාවය සහ උසස් මූල්‍ය සාක්‍ෂරතාවය ඉහළ යන විට ක්ෂුද්‍ර මූල්‍ය උපයෝජනයේ කාර්යයසාධනය ඉහළ යන බව අනාවරණය කර ගැනීමට හැකි විය.
